ZitatAlles anzeigenBeim FCK iwwerlossense nix em Zufall. Fers TV gibt"s sogar die Ausschbroch vunn de Name .
VON CHRISTINE KAMM
Es war jo schunn e bissel abrupt des End vunn dere Fußball-Weldmeschdaschaft. Mir hann"s jo gewisst, awwer"s iss donn doch komisch, wann vunn heit uff morge ga kä Spiel mehr iss. So langsam rollt"s Bällsche jo widda. Soga de Poldi mischt schunn widda munter mit.
Uffem Betze sinn se jo schunn rischdisch hääß. Kä wunner nochem Uffstiesch. Isch hab a kä schlächtes Gfühl. Die erschd Saison iss als so halwer en Selbschdläufer vor lauter Freed. Ach wenn des de Trainer so sischa net sieht. Derfer jo a net. Dass die „Rode Deiwel" jetzt widda ganz owwe mitmische, merkt ma a an Klenischkeide. Hamm die doch jetzt net tatsächlisch so e Lischd rumgschickt, wo"s um die Ausschbroch vunn de Spieler geht. Ga net bleed. Bevor"s em als Pälzer die Ohre rumdreht, wann ma demnegschd Fernseh guckt, weil ma jo net iwwerall mit denne hiefahre kann. Die Fernseh-Kollesche - also meini, net die vunn de Spieler - wern jedenfalls kä Ausredd mehr hawwe. Noch dere Lischd derf do sprochlisch awwer mol gar nix verrudsche. Ob"s so rischdisch needisch war, ich weeßes net. Awwer sischer ist halt sischer.
Bei de meschde Profis kummt ma vunn allä druff. De neie Däne do ver links hinne, Leon Jessen, den schbrischd ma Leon Jäs-sen aus. Jo aller. Dann der schnelle Monn, wo vunn Määnz kumme iss, de Chadli Amri, werd Schadli Amm-ri genannd. Isch hab" immer Tschadli zu emm gsaad, des werd er mer verzeihe. Awwer jetzt kummt"s, der ledschde vunn denne Mohikaner, dem de Ballack Tipps fer zum Ausgehe in Lautre gewwe hott, der werd Than-nos Pätt-ssos gerufe, wobei ma des „Th" wie im Englische ausschbrischd. Sie wissen schunn, do des „Ssss", wo ma die Zung noch vorn an de Gaume drickd. Die „Vics", wo ma hänn, sinn gschenkt. Iwo Ili-tsche-witsch kriegd ma eigentlich selwer noch hie unn ach de Stie-wen Ri-vitsch. Wobei isch schunn hängegebliwwe bin an dem „w" beim Ili-tsche-witsch und dem „v" beim Ri-vitsch. Was do de Unnerschied macht, weeß isch net. Beide hab" isch emol mitem „w" und mit em „v" zu schbreche versucht - kän Unnerschied. Awwer"s kummt noch änner, wo ma uffbasse muss. Ih-lie-an Mi-zan-tski - rischdisch, des is de Ilian Micanski, de neie Stürmer, der bisher en gude Oidrugg hinnerlosse hot. Wischdisch iss awwer schunn, dasse a sein Partner do vorne drin erwähnt henn: de Srdjan iss nämlisch de Sr-dschahn.
Quelle: DIE RHEINPFALZ
Publikation: Ludwigshafener Rundschau