ZitatAlles anzeigenPirmin Rattedaggel: Unn „die Klub" misst e Grang ohne Vier schbiele känne. Wie beim Skat...
Ich wääß jo nätt, ob ihrs aa gelääs hann in de letscht „Rhoipalz am Sunnda": Ei, do hat moi gschätztie Kolleechin Christine Kamm uff de Tittelseit vumm Schbortdääl ihrm Kolleech Michael Konrad, Pälzer-Dialeckt-Schbezzjalischt („Ich mään jo blooß" im gleiche Blatt) unn Bicher-Schreiwer in unsre Mundart („Saach blooß) mol echdie Konkurrenz gemach. Die Iwwerschrift zu ihrm Kommentar 'Anstoß' iss unserämme aame Deiwel nätt glei glatt iwwer die Zung gang („De Sr-dschahn"). Awwer beim Weiterlääse hats sofort gfunkt wie beim Feierwerk iwwerm Exe, am Samschdaaohmd beim Schlabbeflickerfescht: s"Christine gäbbt ab sofort de Lautrer Bundesliga-Schbieler Unnerricht in Pälzisch. Aass dass sich die Roode Deiwel mit Migrantehinnergrund schnell bei de FCK-Fääns integriern.
Ich habb jo devor schunn Mordsreschbeckt gehatt vor so ämme weitsichtiche Fußballträäner wie denne multikulldurelle Lautrer Schbieler ihrer, der mit soim gute deitsche Name Marco Kurz. Seller hat nämlich de gesamte Schbortpresse vaklickert: „Beim 1. FCK wird Deutsch gesprochen' - beim Trääning wie uffem Platz. Adressiert vor allem an „witsche" unn „kitsche', „lecke', „mecke' unn „necke' im Schbielerkader; vumm Sr-dschahn (Srdjan) Lakic aus Euroland bis Rodnei aus Brasillje.
Obse jetzat awwer all ball dreischbroochich sinn (Mutterschbrooch, Deitsch, Pälzisch), - die neckscht Woch, wann die Bundesliga losleet, dess waach ich zu bezweifle. Aller, de Ilian Micancki kommt dann beim 1. FC Köln mittem Lukas Podolski glei klar, fascht Landsleit wie die Zwää sinn, gebirdicherseits. Unn fa Radio- unn Fernsehreporter gäbbts - was fa e Klasse-Kunnedinnscht! - vumm FCK extra e Extrablatt, wos druff schdeht, wie die Schbielername ausgschbroch werre. Zum Beischbiel: Ih-lie-an Mi-zan-tski.
Die Woch druff, im erschte Heimschbiel gää die Bayre uffem Betze, sozesaa „im Schatten von Fritz Walter und Hans-Peter Briegel" känne sich dann de Lautrer Doormann Tobias Sippel unn de WM-Doorschitzekeenich Thomas Müller die Hand gäwwe unn saa"e: Bayern unn Palz Gott erhalts! Mit ämme Hauch Franzeesisch (Ribery), Idalljänisch (Contente), Schbannisch (Demichelis) odder Holländisch (van Ch/Gaal) - Integratzjohn uff Rollrase, Schprachkullduhr im Schdadjon ...
Aller, bei uns do in Bärmesens gäbbts zwar aa längscht Multikullduhr. Awwer noch so gut wie kännie bei de Klub. Jedenfalls allewei nätt bei de erscht Mannschaft in de Owwerliga. Auslännische Kicker sinn beim FKP Geschichte - wie beischbielsweis Bert Carlier aus Holland 1953/54, uff Aueheh mit de Fritz-Walter-Elf mit lauter Lautrer. Witsche hann unser Bloo-Weisse denoh aa gehatt - e Matanovic unn e Cvijanovic; zu demm hann die Fäns awwer bloß Tschiwapptschitschi gsaat. Unn de erscht unn letscht Portugies namens Carvalho galoppiert mittlereweil noch unner de fimfd Klass rum. Ganz nei bei de Klub iss awwer grad widder ää witsch, doch der schreibt sich Novic, Xavier unn iss Franzoos. Erscht drei Schbiele fa die Klub gemach, drei Doore gschoss unn schbielt am Samschdaa, de 14., uff de Huschterheh im DFB-Bogaal gää Bayer Leverkusen! Sogaa vor 10 000 Zuschauer, Schdadjohn heit fascht ausvakaaf. Bis uff etliche Schdehplätz.
PS: Awwer lääder muss de FKP Trääner Wendel Guster gää die „Natzjonalgarde" vunn Schdar-Trääner Jupp Heynckes soine echte Pälzer Buuwe (ausser Novic unn Mathäus Gornik) noch dabber beibringe, wie ma e Grang ohne Vier ausreizt, unn am Enn dann gewinnt. Konzentriert bis in die Hoorschbitze. Mit alle Raffinesse. Schlitzohrich, wie beim Skatschbiel. Aller, selbscht mit vier Buuwe (Alexander Burch, Patrick Hildebrand, Christoph Weller verletzt, Markus Lechner hat Hochzeit) wär seller Grang e sauschwerer Grang. Bloß: Nix iss unmeechlich, im Fußball wie beim Skat. Siehe 2006 - do hat sich dess doch gää Werder Bremen gezeicht. Unn: Ää Trump-Ass vunn sellemols kännt aa gää Bayer Leverkusen e sichrer Schdich fa de FKP mache: Kapitän Sebastian Reich als Vorbild unn die ganz Mannschaft als Schtar! Wann nätt hääßts halt am Enn: Mit Nullouwäär die Schtääbach nunner. Bloo-Weisse sinn lääder Schneider. Odder Schneider schwarz ...
Quelle: DIE RHEINPFALZ
Publikation: Pirmasenser Rundschau